Në çdo shtet normal juridik, Kushtetuta dhe respektimi i saj, janë mbi të gjitha dhe mbi secilin, është qeveria ajo që duhet ta mbrojë nga ndonjë shkelje eventuale, thuhet në përgjigjen e sotme të kabinetit të presidentit Cërvenkovski, ndaj deklaratës së një dite më parë të VMRO-DPMNE-së.

Sipas Cërvenkovskit Qeveria shfaqet në rolin e nxitësit dhe shkelësit të rendit kushtetues, një shtet i këtillë nuk është ligjor, ndërsa qeveria e këtillë nuk është demokratike. Pas zgjedhjeve presidenciale, vazhdon Cërvenkovski, Gruevski e mori përsipër edhe rolin e presidentit.

Sipas Cërvenkovskit, është e qartë se tani Gruevski dëshiron që ti përvetësoj edhe kompetencat e Gjykatës Kushtetuese. Kjo sipas të gjitha teorive dhe përvojave botërore mund të quhet si pushtet totalitar, thekson Cërvenkovski, duke shtuar se politika e Gruevskit bazohet në prodhimin e vazhdueshëm të ndarjeve të brendshme dhe konfrontimeve në shoqërinë maqedonase.

Ky reagim i Cërvenkovskit vjen pas akuzave të djeshme të VMRO-DPMNE-së se Gjykata Kushtetuese është instrument i Cërvenkovskit i cili me 5-6 marionetat, padrejtësisht i anulon të gjitha ligjet që ideologjikisht, politikisht dhe nga arsye të tjera nuk i pëlqejnë.