Presidenti Behgjet Pacolli nuk e di vlerën e rrogës mujore duke qenë në krye të shtetit, por çfarëdo qoftë ajo, ka vendosur të mos e marrë dhe t’ua ndajë 10 familjeve kosovare.

Të dielën Pacolli ka vizituar familjen e Naim Bunjakut në lagjen Dodona të Prishtinës, që do të marrë një pjesë të rrogës mujore presidenciale, lajmëroi Indeksonine.

Edhe nëntë familje të tjera do të përfitojnë nga rroga e një presidenti të ri të Kosovës, që është rreth tre mijë euro.

Pacolli është pyetur edhe për raportin e Kohës Ditore, sipas së cilës, ai ka shkelur Kushtetutën, duke votuar qeverinë si president. Ai ka thënë se do t’i përkasë Gjykatës Kushtetuese të vendosë për një gjë të tillë.