Dy banesa janë djegur ndërsa disa të tjera janë dëmtuar nga një zjarr që ka shpërthyer mbrëmë rreth orës 23, në një objekt banimi, në rrugën JNA në Gostivar.

Pronarët e banesave të djegura nuk janë prononcuar ndërsa fqinjët e tyre, banesat e të cilave po ashtu janë dëmtuar dyshojnë që zjarri të ketë shpërthyer si pasojë e oxhakut të papastruar dhe erës së fort që frynte mbrëmë.

“Neve na kanë njoftuar nga ora 22: 30 kur e kanë hetuar të gjithë por zjarri kishte filluar më herët, zjarrfikësit kanë qenë këtu nga ora 19 e 30 fjala se e kanë sanuar dhe iu kanë thënë ta lagin, oxhakun por çka ka qenë kjo punë nuk dihet”, deklaroi Dobre Stojanovski.

“Unë kam ndenjur deri nga 2 e 30 sepse u mbush banesa me ujë, unë kur erdha zjarrfikësit i gjeta këtu në 11 e 30, një herë thonin nga korrenti, tani thonë nga oxhaku, nuk e di”, tha Sinan Rexhepi.
Rasti është konfirmuar edhe nga Sektori i Punëve të Brendshme i Tetovës.

“Mbrëmë ka shpërthyer zjarr në nën-kulmin e objektit banesor në rrugën “Pavle Avramovski” në Gostivar”, për një kohë të shkurtër zjarri është përhapur dhe janë djegur dy banesa në atë ndërtesë. Me intervenimin e zjarrfikësve diku rreth orë një pas mesnate zjarri është lokalizuar. Shkaqet dhe dëmet materiale janë duke u konfirmuar”, u shpreh Marjan Josifoski, Zëdhënës i SPB-Tetovë.

Hetimet kanë vazhduar edhe gjatë ditës së sotme për të konfirmuar shkaqet e këtij zjarri, që për fat të mirë ka mbaruar pa pasoja në njerëz. Bashkim Sulejmani