Delegacioni i Bashkimit Evropian në bashkëpunim me EU Info Point pranë Komunës së Gostivarit, organizoi sot një prezantim të Programit për bashkëpunim ndërkufitar të Bashkimit Evropian.

Prezantimin të cilin e bëri Stefan Bill – koordinator i delegacionit të BE-së për Maqedoni, e ndoqën përfaqësues të organizatave joqeveritare dhe institucioneve lokale, si dhe punonjës të administratës komunale.

Të pranishmit u njoftuan me formën e aplikimit për projekte nga IPA fondet, vlerën e projekteve si dhe afatet kohore.

Në cilësinë e nikoqirit të pranishmëve iu drejtua sekretari I komunës Naxhi Xhelili, i cili theksoi: Bashkëpunimi ndërkufitar zanafillën e vet e ka në vendosjen e bashkëpunimit ndërmjet Francës dhe Gjermanisë në sferën e thëngjillit, e që më pas ky bashkëpunim u zgjerua edhe me shtete tjera dhe në më shumë fusha duke krijuar kështu Bashkësia Ekonomike Evropiane, e cila tanimë është transformuar në Bashkim Evropian si një union i fuqishëm ndërkombëtar”.

Ai bëri të ditur se Komuna e Gostivarit, tanimë ka vendosur bashkëpunimin ndërkufitar me Republikën e Shqipërisë, nëpërmjet Bashkisë së Korçës në sferën e turizmit malor, por se ky lloj bashkëpunimi duhet të zgjerohet edhe me shtetet tjera fqinje, si dhe bashkëpunimi të përfshijë edhe sfera tjera ekonomike, sociale, arsimore, kulturore etj.