OKB ka shfaqur të enjten shqetësimin e saj të madh përballë vdekshmërisë së madhe të bletëve, të cilat në shumë rajone të botës po vdesin si pasojë e efekteve të ndotjes së ambientit, e sidomos nga pesticidet.

Ky fenomen është vërejtur kryesisht në vendet e industrializuara të hemisferës veriore, shpjegon Programi i Kombeve të Bashkuara për Ambientin (ENUP) në një raport të publikuar të enjten.

Në mesin e nja dhjetë faktorëve shpjegues të përfshirë në dokument janë përdorimi i pesticideve, ndotja e ajrit, zvogëlimi i numrit të bimëve me lule dhe i numrit të bletarëve në Evropë, si dhe ekzistimi i një paraziti vdekjeprurës, i cili po i mbyt vetëm bletët e hemisferës veriore.

Vdekshmëria e bletëve është duke përparuar (deri në 85% në disa rajone) dhe mund të ketë pasoja të rënda në prodhimin ushqimor pasi që shumë bimë, që kultivohen ose jo, polenizohen nga bletët. Kështu, raporti tregon se puna e bërë nga të gjithë polenizuesit është e një vlere prej rreth 153 miliardë euro, pra 9,5% e vlerës së prodhimit botëror të produkteve bujqësore.

Shkencëtarët megjithatë nuk kanë arritur të masin ndikimin e drejtpërdrejt të vdekshmërisë së bletëve në kultivimin e pemëve dhe perimeve.

“Mënyra se si njerëzimi i menaxhon veprimet e tij që kanë të bëjnë me natyrën, sidomos me polenizuesit, do të përcaktojë pjesërisht të ardhmen tonë kolektive në shekullin XXI”, ka deklaruar drejtori ekzekutiv i UNEP, Achim Steiner, gjatë një konference për shtyp. “E vërteta është se nga 100 lloje bimore që japin 90 për qind të ushqimit botëror, më shumë se 70 polenizohen nga bletët”, ka shtuar ai.

“Numri i kolonive të bletëve viteve të fundit në Evropë ka rënë për 10 deri 30%, për 30% në SHBA, për më shumë se 85% në Lindjen e Mesme”, ka shpjeguar Peter Neumann, një prej autorëve të këtij raporti të parë të OKB-së rreth zhdukjes së bletëve.

Një sindrom, i cili nuk e ka prekur Amerikën Latine, Afrikën dhe Australinë. “Është një çështje tejet komplekse. Këtu ndërveprojnë shumë faktorë dhe një vend i vetëm nuk mund ta zgjidhë problemin”, ka theksuar Neumann, duke bërë thirrje për formimin e një rrjeti ndërkombëtar që do ta trajtonte problemin.

Ky shkencëtar gjerman, i cili punon në Qendrën për hulumtime për bletët në Zvicër ka treguar se prania e molës “Varroa destructor” është një prej arsyeve të zhdukjes së bletëve në Evropë dhe Amerikën Veriore. (AFP)

Vetëm hemisfera veriore viktimë e sindromës

Fenomeni i vdekshmërisë së bletëve është vërejtur kryesisht në vendet e industrializuara të hemisferës veriore, ndërsa ka kursyer Amerikën Latine, Afrikën dhe Australinë. Sipas shkencëtarit gjerman, Peter Neumann, prania e molës “Varroa destructor” është një prej arsyeve të zhdukjes së bletëve në Evropë dhe Amerikën Veriore.