Zëvendëskryeministri Abdilaqim Ademi dhe ministri i Shëndetësisë Bujar Osmani sot merrnin pjesë në ceremoninë me rastin e emërimit të spitalit të përgjithshëm të Gostivarit në Ferid Murad.

Vendimin për emërimin e solli qeveria në seancën e fundit me propozim të Ministrisë së Shëndetësisë.

"Kjo është simbolikë që nënkupton se spitali duhet që të jetë vend ku do dalin kuadro të reja. Në Ministrinë e Shëndetësisë, në mënyrë të vazhdueshme investojmë në edukimin dhe në krijimin e kushteve për suksese të reja dhe nobelistë të rinj", tha Osmani.

Në ceremoni në oborrin e spitalit u lexua edhe një letër nga Ferid Murad në të cilën shprehet falenderim për respektin e treguar.

Shkencëtari mjekësor Ferid Murad, lindi në SHBA, ndërsa babai i tij ka lindur në fshatin Llakavicë të Gostivarit. Për arritjen në shkencë, në vitin 1998 ai ka marrë çmimin nobel për mjekësi.

Paraprakisht, spitali i specializuar në Çair u emërua sipas nobelistes Nënë Tereza.