Me qëllim të zhvillimit të bashkëpunimit akademik në arsimin sipëror dhe në pajtim me qëllimet dhe interesat e përbashkëta, Universiteti Shtetëror i Tetovës dhe Universitetit “Aleksandër Xhuvani”, nga Elbasani, Republika e Shqipërisë, nënshkruan Marrëveshje për bashkëpunim.

Gjatë vizitës në USHT, delegacioni i Universitetit “Aleksandër Xhuvani”, i përfaqësuar nga Rektori, Prof. dr. Liman Varoshi, realizoi një takim pune me Rektorin e USHT-së, Prof. dr. Agron Reka.

Në fillim, bashkëbiseduesit e vlerësuan si tejet të rëndësishëm bashkëpunimin ndëruniversitar, me theks të veçantë ndërtimin dhe forcimin e marrëdhënieve institucionale me universitetet shqiptare.

Në kuadër të këtij takimi të zgjeruar, ku morën pjesë Prorektori për arsim, Prof. dr. Ismail Ahmedi, Prorektori për shkencë, Prof. dr. Reshat Qahili, Prorektori për financa, Prof. dr. Serafim Tomovski, dekani i Fakultetit Filozofik, Doc. dr. Fehari Ramadani dhe dekani i FSHMN-së, Doc. dr. Muhamed Shehabi, Shefja e Zyrës për marrëdhënie me jashtë, Valdrina Fetai, si dhe Shefja e Kabinetit, Ganimete Bexheti, i theksuan prioritet e marrëveshjes që do të realizohen në të ardhmen.

Marrëveshja për bashkëpunim e dëshmon qëllimin e të dy institucioneve që të fillojnë dhe zhvillojnë bashkëpunim të ndërsjellë në procesin e edukimit dhe punën kërkimore-shkencore.

Dy universitet shqiptare do të marrin pjesë në programet arsimore dhe shkencore, të financuara nga Bashkimi Evropian, do të angazhohen të realizojnë projekte kërkimore-shkencore me interes të përbashkët, konferenca shkencore, simpoziume, seminare, punëtori shkencore dhe profesionale.

Po ashtu, pritet të shkëmbejnë libra, revista, publikime, botime bibliografike, literaturë shkencore dhe metoda shkencore me interes të përbashkët, si dhe të shkëmbejnë plane dhe programe mësimore për të gjitha ciklet e studimeve universitare.