Rreth tre milionë fidane sot janë mbjellë në një sipërfaqe prej 755 hektarësh, në 70 lokacione në 30 komuna mbarë Maqedonisë, në kuadër të aksionit të shtatë "Dita e drurit - pranvera 2011" që realizohet me moton "Ejani në mbjellje, lëre politikën madje sot".

Iniciatori, maestro Boris Trajanov aksionin e vlerësoi si të mirë, ndërsa shkak për këtë thotë se janë kushtet e mira kohore.

"Aksioni u bë pjesë e kulturës sociale të qytetarëve. me shumë përpjekje të vogla arritëm ta realizojmë atë që e kemi planifikuar", ta Trajanov.

Tradicionalisht, aksionit iu bashkangjitet kreu shtetëror, anëtarë të Qeverisë, administrata shtetërore, ARM-ja...

Aksioni "Dita e drurit - pranverë 2011" filloi në mënyrë simbolike të enjten me mbjelljen e fidaneve nga ana e përfaqësuesve të bashkësive fetare. E vazhduan të hënën bashkëshortet e presidentit të Republikës së Maqedonisë dhe të ambasadorëve në shtet, ndërsa dje me pjesëmarrjen e vet në gjelbërim kontribuan edhe zëvendëskryeministri për Çështje Evropiane, Vasko Naumovski, shefi i diplomacisë Antonio Milloshoski dhe përfaqësues të korit diplomatik.

Për pjesëmarrje sa më masive në aksion, Qeveria e shpalli ditën e sotme ditë jopune, që do të punohet të shtunën më 9 prill, ndërsa është siguruar edhe transport falas me autobusë deri te lokacionet ku do të mbillen fidanet.

Në gjashtë aksionet e kaluara u mbollën mbi 30 milionë fidanë në sipërfaqe prej 8.641 hektarë dhe është hedhur farë për katër milionë fidane.

Aksioni i parë u zbatua më 12 mars të vitit 2008 kur u mbollën dy milionë fidanë. Më 28 tetor 2008 u organizua edhe aksioni i dytë me mbjelljen e gjashtë milionë fidaneve, më 14 mars 2009 Maqedonia u pyllëzua me edhe pesë milionë fidane, ndërsa më 19 nëntor u mbollën edhe 7,5 milionë fidane të tjera. Më 31 mars, gjatë aksionit të pestë u mbollën përafërsisht shtatë milionë fidanë, ndërsa më 19 nëntor të vitit të kaluar rreth shtatë milionë fidane.