Në Maqedoni me një seri manifestimesh sot u shënua 2 prilli - Dita botërore e autizmit.

Në organizim të Shoqatës shkencore të Maqedonisë për autizëm tek shtëpia përkujtimore e Nënës Terezë në mënyrë simbolike u shpërndanë 300 balona, bluza me shenjë të autizmit dhe 1.200 pamflete me informata bazë për autizmin.

Mbështetës të manifestimit janë bashkëshortja e presidentit të Republikës së Maqedonisë, Maja Ivanova dhe prefekti i komunës Qendër, Vlladimir Todoroviq.

Në Fakultetin e Mjekësisë në Shkup, ndërkaq, do të mbahet panel diskutimi për autizmin dhe tretmanin e personave me autizëm në Maqedoni dhe në botë. Panel diskutimi është në organizim të shoqatës së qytetarëve "Në botën time", ndërsa qëllimi është që të rritet ndërgjegjja se autizmi ekziston edhe tek ne dhe i prekë jo vetëm individët por edhe institutet relevante.