Lëvizja Qytetare "Zgjohu", në Kapan An në Çarshinë e Vjetër të Shkupit, mbrëmë ka festuar ditëlindjen e tretë.

Në ceremoninë e rastit morën pjesë emrat e njohur të skenës politike, ambasadorë si dhe mysafirë nga Kosova dhe Shqipëria.

Kryetari i Lëvizjes "Zgjohu", Artan Grubi deklaroi se lëvizja qytetare të cilën e udhëheq ai ka sjellë frymë të re dhe që ajo gjatë tre viteve të funksionimit ka arritur të ndërgjegjësojë popullatën shqiptare në Maqedoni dhe që shpreson se kjo rrugë që e hapi kjo lëvizje do të ndiqet edhe më tej si nga qytetarët ashtu edhe nga politikanët.

"Jemi jashtëzakonisht krenar për rezultatet e ZGJOHUT, në veçanti në vetëdijesimin e popullatës shqiptare në Maqedoni me theks të veçantë në Shkup, në veçanti në fushën e ngritjes së vetëdijes së mbrojtjes së trashëgimisë shpirtërore dhe kulturore të shqiptarëve, në ngritjen e vetëdijes për refuzimin e armëve, për refuzimin e dhunës tek shqiptarët dhe më duhet të them që rezultatet janë të dukshme. Qytetarët e përkrahin lëvizjen "Zgjohu" dhe në veçanti në evenimentet që ne i bëjmë për të ngritur dhe përforcuar identitetin kombëtar tek të gjithë shqiptarët në Shkup, qytetarët i përgjigjen kësaj me një mënyrë të jashtëzakonshme dhe marrin pjesë masivisht në evenimentet tona", deklaroi kryetari i Lëvizjes Qytetare "Zgjohu", Artan Grubi.