Të paktën dy djem të liderit libian, Moamar Gadafi, kanë propozuar vendosjen e demokracisë kushtetuese, e cila do të nënkuptonte largimin e babait të tyre nga pushteti, shkruan “New York Times”.

Duke iu referuar një diplomati të paemëruar dhe një zyrtari libian, të cilët janë të njoftuar me këtë plan, gazeta pohon se tranzicionin do ta udhëhiqte një nga djemtë e Gadafit, Seif al-Islam Gadafi.

Tani për tani nuk dihet nëse lideri libian ka pranuar këtë propozim, të cilin e mbështesin djemtë e tij Saif dhe Sadi al-Gadafi, por një person i afërt me ta tha se koloneli, siç duket, është i gatshëm të pranojë një plan të tillë, transmeton AFP.

Djali i Gadafit, Khamis Gadafi, udhëheq brigadën ushtarake, ndërsa Mutasim, djali i katërt, këshilltar për siguri kombëtare, konsiderohet kundërkandidat i Saifit për vendin e liderit të ardhshëm libian.