Kosova ka fituar vota të mjaftueshme për anëtarësim në Fondin Monetar Ndërkombëtar (FMN).

Radio Televizioni i Kosovës (RTK) sot lajmëroi se nga 185 vende anëtare, afro 100 vende kanë votuar për pranimin e Kosovës në këtë organizatë.

Rezultatet e votimit do t’i paraqiten sot Bordit të Drejtorëve Ekzekutivë, ndërsa zyrtarisht do të bëhet i ditur të premten.

Ministri i Ekonomisë dhe Financave Ahmet Shala, bëri të ditur se anëtarësimi i Kosovës nuk do të ketë drejtpërdrejt pagesë të menjëhershme prej 65 milionë eurosh në FMN duke theksuar se Kosova mund të tërheq kredi të buta nga FMN-ja.

Shala ka shtuar se anëtarësimi i Kosovës në FMN është parakusht për anëtarësim në çdo institucion tjetër financiar ndërkombëtar dhe i njëjti hap dyert për anëtarësim edhe në Bankën Botërore. /Makfaks/