- Me ndihmë financiare të Bankës Gjermane për zhvillim KfW, në Maqedoni në vjeshtë do të fillojë të ndërtohet Parku i parë i erës.

Për projektin me vlerë prej gjithsej 55 milionë euro, marrëveshje sot nënshkruan Ministria e Financave, Banka KfW dhe SHA ELEM.

"Sot e mbyllëm konstruksionin financiar për ndërtimin e parkut të erës Bogdanci. Me marrëveshjet që i nënshkruam me KfW bankën janë siguruar 32,9 milionë euro, ndërsa 22,6 të tjera do t'i sigurojë SHA ELEM nga mjetet e tyre", tha zëvendës-kryeministri dhe ministri i Financave, Zoran Stavreski pas nënshkrimit të marrëveshjes.

Në Parkun e erës në 29 hektarë është paraparë ndërtimi i 15 deri 18 mullinjve me erë, secili me kapacitet prej 2 deri 3 megavatëve. Fuqia e përgjithshme e prodhimit të Parkut me erë do të jetë 100 gigavatë në orë. Ndërsa kapaciteti 37 megavatë.

Projekti do të realizohet në dy faza. Faza e parë përfshin instalimin e mullinjve më erës dhe duhet të përfundojë më së voni për dy vite, ndërsa e dyta ka të bëjë me instalim plotësues të turbinave me erë me të cilat fuqia e Parkut me erë u rrit për rreth 50 megavatë.