Universiteti Shtetëror i Tetovës, më 6-8 prill mori pjesë në Panairin e Edukimit në Prishtinë, i cili u organizua nga kompania CEO dhe Ministria e Arsimit, Shkencës dhe Teknologjisë e Republikës së Kosovës.

Gjatë ditëve të panairit Universiteti Shtetëror i Tetovës shpalosi programet dhe ofertat për studimet e ciklit të parë dhe të dytë, aktivitete dhe kualifikime të tjera të niveleve dhe të profileve të ndryshme.

Në hapjen solemne të Panairit të edukimit, ishte i pranishëm edhe ministri i Arsimit, Shkencës dhe Teknologjisë i Republikës së Kosovës, Ramë Buja, i cili në fjalën e tij përshëndetëse theksoi se studentët që dëshirojnë të shkojnë për shkollim kudo në botë, kanë një rast të mirë të njihen me oferta konkrete.

“Panairi i Edukimit, i cili organizohet për të katërtën herë me radhë, është mundësi e mirë për të gjithë. Në të ardhmen ky panair do të jetë edhe më i pasur dhe aktivitetet e kësaj natyre do të shërbejnë për kauzën tonë ,,Kosova shtet i dijes”, theksoi ministri Buja, i cili me këtë rast shoqërohej edhe nga ambasadori i Shqipërisë në Kosovë, Islam Llauka.

Gjatë vizitës që u bëri stendave të universiteteve pjesëmarrëse në këtë Panair, ministri Buja u ndal edhe në stendën e USHT-së, ku nga udhëheqësi i delegacionit të Universitetit tonë, Selam Sulejmani, u njoftua në detaje me ofertën e USHT-së për vitin akademik 2011/2012, si dhe kushtet që ju ofrohen studentëve nga Republika e Kosovës.

Gjatë tri ditëve sa zgjati Panairi i edukimit, i cili u zhvillua në Sallën e Kuqe të Pallatit të rinisë në Prishtinë, oferta e USHT-së zgjoi kureshtje të madhe tek maturantët, të cilët shprehnin interesimin e tyre për të studiuar në USHT, por edhe te studentët të cilët interesoheshin për kushtet që i ofron universiteti ynë, për ciklin e dytë të studimeve.

Po ashtu, gjatë kohës së zgjati Panairi i Edukimit, udhëheqësi i Zyrës për Informim e USHT-së, Selam Sulejmani dhe ai i Qendrës për Shërbime Studentore dhe Karrierë, Daut Memeti, realizuan një sërë takimesh me përfaqësues të universiteteve dhe institucioneve të tjera arsimore nga Republika e Kosovës dhe rajoni, si dhe dhanë më shumë deklarata për mediat elektronike dhe ato të shkruara.

Për pjesëmarrje të suksesshme në Panairin e edukimit në Prishtinë, Universitetit Shtetëror të Tetovës, nga Kompania CEO-s iu nda Certifikatë.