Turneu aktual i grupit “U2” është bërë një nga turnetë më fitimprurës në histori, duke thyer edhe rekordin e mëhershëm që mbante rock grupi legjendar “Rolling Stones”, në periudhën prej 2005 - 2007.

Rock këngëtarët irlandezë kanë arritur rekordin botëror prej 558 milionë dollarëve nga koncerti i tyre në Sao Paolo të Brazilit, i cili u mbajt të dielën mbrëma.

Turneu i “U2” ka nisur në korrik të vitit 2009 në Barcelonë dhe në kuadër të tij grupi do të performojë edhe në 20 vende. Më shumë se shtatë milionë bileta janë shitur për 110 spektaklet e grupit.

Data finale e turneut është 30 korriku i këtij viti, kur grupi do të performojë në festivalin “Music Hill Mustical” në Moncton të Kanadasë. Para këtij koncerti, grupi do të performojë edhe në festivalin “Glastonbury”.