Drejtoresha e shkollës së mesme të ndërtimtarisë ‘Zdravko Cvetkovski’, Dragica Konstadinova është dorëhequr nga posti i saj. Vendimi i tillë është marrë vetëm një javë pas vrasjes së nxënësit Muhamed Jashari në oborrin e kësaj shkolle.

Dorëheqja e drejtoreshës Konstadinova gjithashtu vjen menjëherë pas seancës së mbrëmshme të Këshillit të ‘Qytetit të Shkupit’, ku këshilltarët e LSDM-së kishin kërkuar nga ajo që të japë dorëheqje me qëllim që në të ardhmen të jetë shembull për të tjerët. Por nga LSDM-ja sot thanë se kjo nuk është e mjaftueshme, ata kërkuan dorëheqjen edhe të kryebashkiakut Trajanovski dhe Ministrit të Arsimit, Todorov.

“Dorëheqja e detyruar nuk është e mjaftueshme për marrjen e përgjegjësisë. Insistojmë që sa më shpejtë të suspendohet këshilli i shkollës, kurse përgjegjësinë ta marrin edhe kryebashkiaku i Qytetit të Shkupit, Koce Trajanovski dhe Ministri i Arsimit, Nikolla Todorov”, deklaroi Aleksandar Naumovski, LSDM.

Por siç mëson Alsat-M, aktualisht kolektivi i shkollës ka filluar të mbledh nënshkrime për të mos pranuar dorëheqjen e drejtoreshës. Ndërkaq deri më tani si përgjegjës të vetëm të aktit tragjik janë 16 vjeçari i dyshuar për vrasjen e Jasharit i cili gjendet në paraburgim dhe kundër tij është ngritur padi penale, dhe bashkëmoshatari i tij, i cili do të përgjigjet për ushtrim të dhunës.

Në seancës e djeshme të Këshillit të ‘Qytetit të Shkupit’ gjithashtu nga këshilltarët e PDSH-së ishte kërkuar riemërtimi i shkollës nga ‘Zdravko Cvetkonvski’ në ‘Muhamed Ali Jashari’. Propozimin e tillë e mbështeti Lidhja e nxënësve shqiptar.

“Lidhje a nxënësve shqiptar përkrah iniciativën nga Këshilltarët e ‘Qytetit të Shkupit’ për ndërrimin e emrit të shkollës së mesme të ndërtimtarisë nga ‘Zdravko Cvetkovski’ në ‘Muhamed Ali Jashari’. Sinqerisht e përkrahim iniciativën e këshilltarëve, por ky veprim të mos shfrytëzohet për poenë politik sepse jemi në prag të zgjedhjeve”, deklaroi Qerim Bushi, kryetar i ‘Lidhjes së nxënësve shqiptar’.
Përndryshe emri aktual i shkollës së mesme të ndërtimtarisë ‘Zdravko Cvetkovski’ i referohet një arkitekti.