Univeristeti Shtetëror i Tetovës, përpos angazhimeve për krijimin e kushteve sa më të mira për studentët dhe stafin akademik, angazhohet edhe për ofrimin e ndihmës akademike dhe profesionale edhe institucioneve dhe ndërmarjeve të ndryshme. Kështu, pas nënshkrimit të marrëveshjeve për bashkëpunim, më 09 mars 2011, me 25 ndërmarrje private, gjatë kësaj jave, USHT nënshkroi marrëveshje bashkëpunimi edhe me njërin prej kapaciteteve më të mëdha prodhuese, jo vetëm në rajonin e Tetovës por edhe në mbarë vendin, “Jugohrom Feroalojs Shpk”.

Me anë të kësaj marrëveshje për bashkëpunim arsimor, shkencor dhe profesional, që në prani të ministrit të Arsimit dhe Shkencës, Nikolla Todorov, e nënshkruan rektori i USHT-së, Prof. dr. Agron Reka dhe Drejtori i përgjithshëm i Jugohrom Feroalojs Shpk - Jegunovcë, z. Vlladimir Shedrovicki, parashihet realizimi i disa aktiviteteve, siç janë: Organizimi i trajnimit të punëtorëve të Jugohromit për përmirësimin e përgatitjes së tyre profesionale në programet dhe fushat e specializimit sipas marrëveshjes, studime shkencore dhe specialistike nga veprimtaria e Jugohromit, zgjidhja e problemeve nga mbrojtja e ambientit jetësor, shfrytëzimi fondit bibliotekar të Universitetit, dhënia e bursave për një numër të caktuar të studentëve me marrëveshje gjatë tërë studimeve dhe punësimi i tyre në Jugohrom, sigurimi kushteve për relizimin e punës praktike profesionale për studentët e Universitetit Shtetëror të Tetovës, të cilët trajnohen sipas fushave të specializimit, të cilat do të zbatohen në procesin e prodhimit në Jugohrom, angazhimi i ekspertëve të Jugohromit, nga Jegunovca, në procesin mësimor të Universitetit Shtetëror të Tetovës, si dhe fusha të tjera.

Nënshkrimin e kësaj marrëveshje, përpos rektorit, Prof. dr. Agron Reka e përshëndetën edhe drejtori i përgjithshëm i Jugohrom Feroalojs Shpk - Jegunovcë, z. Vlladimir Shedrovicki, i cili theksoi se kjo marrëveshje në rradhë të parë do të kontribuojë në përmirësimin e ambientit ekologjik të hapësirës në të cilën jetojmë, ndërkohë Ministri i Arsimit dhe Shkencës, Nikolla Todorov, theksoi se USHT dëshmon qartë se i plotëson të gjitha kushtet për funksionimin e mirëfilltë për arsim të lartë në RM dhe se të gjitha universitetet publike në vend duhet ta marrin si model bashkëpunimin e USHT-së me kompanitë e ndryshme.