Tani kur kanë filluar punët sezonale bujqësore, Komuna e Gostivarit u del në ndihmë bujqve të rajonit. Në distriktin e fshatit Debresh, është pastruar kanali për ujitje të tokave të bukës në një gjatësi prej 4 kilometrash. Për shkak të pa kalueshmërisë së mekanizimit, pastrimi është bërë në mënyrë manuale. Punët janë kryer në bashkëpunim me Bashkësinë lokale të fshatit Debresh.

Sipas kërkesës të një grupi të banorëve nga fshati Forinë, komuna e Gostivarit u doli në ndihmë bujqve të kësaj ane duke rrafshuar dhe tamponuar rrugët fushore në distriktin e këtij fshati. Janë rrafshuar dhe tamponuar rrugë në gjatësi prej rreth 3 kilometrash.

Në fshatin Çajlë dhe në lagjen Pitarnicë, gjithashtu ka intervenuar Komuna e Gostivarit, me ç’rast rrugët fushore janë pastruar nga hedhurinat e ndryshme dhe nga mbetjet ndërtimore. Janë grumbulluar dhe janë deponuar dhjetëra kamionë me hedhurina.

Me këtë veprim, Komuna e Gostivarit tregon se gjithmonë është e gatshme që t’u del ne ndihmë bujqve dhe të gjithë atyre të cilët kontribuojnë në zhvillimin ekonomik të komunës sonë.