Ai është një vend tërheqës alpin me terrene të shkëlqyeshme për ski, me një kështjellë përrallore dhe me një sipërfaqe të ngjeshur prej 160 kilometra katrorë. Tani, krejt shteti i vogël i Lihtenshtajnit po jepet me qira për vetëm 40.000 funte për një natë.

Të interesuarve të cilët e pranojnë ofertën e pazakontë po u premtohet administrimi i principatës alpine, e cila ndodhet në Evropën Qendrore, ndërmjet Austrisë dhe Zvicrës.

Oferta unike për qiradhënie po reklamohet në uebsajtin amerikan “Airnbn”, i cili rëndom ofron ndihmë për akomodim të pushuesve në apartamente me qira, dhe i cili po ofron principatën e vogël evropiane me qira bashkë me firmën vendore të marketingut “Xnet”.

“Pronarët” e rinj, posa të arrijnë në vend, do të marrin një “çelës simbolik të shtetit”, në një ceremoni në parlamentin e ri të vendit. Qiraxhinjtë mund të organizojnë një paradë apo edhe të emërojnë ndonjë nga rrugët e Liehtenshtajnit për nder të tyre – përkohësisht.

Vendi mund të merret me qira për minimum dy net, por qiraxhinjve u premtohet një fundjavë e ngjeshur – shijim i verës nga bodrumi i Princit të Lihtenshtajnit, ski dhe darkë e bollshme me pamje nga Kështjella e Vaduzit. Popullsia e vendit prej 33.000 banorë do të ketë të drejtë të qëndrojë, por qiramarrësit i premtohet një “pjesë e madhe” e territorit.

“Airbnb” në uebsajt thotë se kjo është një marrëveshje e mirë për rezidentët, sepse “secili eveniment do të ofrojë punë të konsiderueshme për tregtarët vendorë dhe për ofruesit e shërbimeve të ndryshme. nga akomodimi, ushqimi, deri te infrastruktura dhe aktivitetet”.

Forca e policisë së Lihtenshtajnit, me 110 pjesëtarë, do të jetë tërësisht në shërbimin tuaj, por marrë parasysh se vendi ka një prej shkallëve më të ulëta të krimit në botë, oficerët e tij të armatosur me siguri do të shërbejnë si ciceronë për të dhënë informata për turizëm.

Këngëtari amerikan Snoop Dogg kishte kërkuar qasje ekskluzive në Lihtenshtajn vitin e kaluar për xhirimin e një spoti, por nuk i kishte njoftuar autoritetet me kohë dhe kërkesa e tij ishte refuzuar. Ata që duan të marrin vendin me qira duhet të njoftojnë qiradhënësin gjashtë muaj më parë për interesimin e tyre, ndërsa ndëshkimi për anulimet e minutës së fundit është se do t’ju kthehet vetëm gjysma e shumës së paguar.

Kompania turistike tani po e zgjeron veprimtarinë e saj dhe për të interesuarit po ofron qasje ekskluzive edhe në gjashtë fshatra të Austrisë, në tre qyteza të Gjermanisë dhe në një fshat turistik në Zvicër.

Një zëdhënëse e Zyrës për Informim të Liehtenshtajnit në kryeqytetin e principatës, në Vaduz, ka thënë se është “befasuar” kur ka dëgjuar se vendi i vogël evropian po jepet me qira dhe se nuk është në dijeni për ndonjë qiramarrës të menjëhershëm. (The Independent)

Përparësitë e qiramarrësit

Vendi mund të merret me qira për minimum dy net, por qiraxhinjve u premtohet një fundjavë e ngjeshur – shijim i verës nga bodrumi i Princit të Lihtenshtajnit, ski dhe darkë e bollshme me pamje nga Kështjella e Vaduzit. Popullsia e vendit prej 33.000 banorësh do të ketë të drejtë të qëndrojë, por qiramarrësit i premtohet një “pjesë e madhe” e territorit.