Ky është një udhëtim mu në zemër të taigës së Ussurisë, në Lindjen e Largët të Rusisë. Pikërisht këtu piqen frytet e shenjta të xhensenit shekullor. Bufë të mëdhenj gjuajnë në lumenjtë që ziejnë nga peshku i shumtë, kurse shamanët-udigejcë vazhdojnë akoma luftën e vet me qytetërimin teknokratik.

Tigrat siberianë, të njohur gjithashtu si tigrat e Amurit apo Manchurianë, janë përfaqësuesit më të mëdhenj të familjes së maceve në planet. Tigrat e rritur meshkuj mund të peshojnë deri në 350 kilogramë. E imagjinoni dot një kafshë me masë të tillë trupore që vrapon me shpejtësi 90 kilometra në orë! Në natyrë të egër jetojnë rreth 400 qenie të këtij lloji.

Mbreti i tajgës është kafshë principialisht vetmitare. Ai është i aftë të ndjejë prezencën e njeriut në një largësi prej më tepër se 300 metra. Këlyshët lindin zakonisht në verë dhe femra i mban ata për ti edukuar pranë vetes gati dy vjet. Ajo i mëson ata të gjuajnë prenë dhe të jenë jashtëzakonisht vigjilentë, veçanërisht ndaj armikut të tyre kryesor-njeriut.

Tigri i Amurit ka hyrë në Librin e Kuq të Rusisë. Në prill të vitit 2007 ekspertët e Fondit Botëror të Natyrës së Egër (ËËF) deklaruan se popullata e tigrave të Amurit ka arritur maksimumin e vet shekullor dhe se tigri nuk ndodhet më në prag të zhdukjes. E megjithatë, mbrojtja e tij aktualisht është e rëndësishme si kurrë ndonjëherë më parë.

Në këtë zonë ndodhet gjithashtu edhe rezervati detar i Lindjes së Largët në Detin Japonez. Ai është i vetmi në Rusi. Në këtë pjesë të Detit Japonez banojnë vazhdimisht: fokat-Larga, karavidhet e Kamçatkës, yje të stërmëdhenj detarë, trepangat, molusqet e quajtura lafsha deti (lat. Pectinidae), gati 300 lloje peshqish. Kurse ngandonjëherë vijnë edhe banorë të tillë ekzotikë të ujërave jugore, si peshku - çekiç dhe morena.

Jeton në këtë zonë edhe një popullatë jo fort e madhe e leopardit tejet të rrallë të Lindjes së Largët. Askund në botë nuk ndeshet më një kafshë e tillë mishngrënëse çuditërisht e bukur, e hijshme, elegante.