Vullkani më aktiv në Islandë ka filluar shpërthimin, mirëpo shkencëtarët thonë se duket që ka shumë pak mundësi të pengojë serish trafikun ajror të Evropës, siç ndodhi me shpërthimin e një tjetër vullkani islandik, vitin e kaluar.

Zyra Meteorologjike e Islandës e ka konfirmuar se shpërthimi ka filluar të shtunën në vullkanin, Grimsvotn. Agjencia e lajmeve, Reuters, citon një gjeologjist të kësaj zyreje duke thënë se vullkani e ka hedhur në ajër në lartësi prej 15 kilometrave, një shtëllung të tymit të bardhë.

Në prill të vitit 2010, trafiku ajror i Evropës ishte ndërprerë për javë të tëra nga shtëllungat e hirit nga një tjetër vullkan i këtij shteti. Islanda është vendi më aktiv vullkanik në botë.