-Një i vdekur dhe 5 të plagosur është bilanci tragjik i një aksidenti të ndodhur mbrëmë pas mesnate në rrugën kombëtare Janinë-Artë, në afërsi të fshatit Terovo.

Shoferi i një autobusi me targa shqiptare që bënte linjën Athinë-Tiranë, në rrethana të paqarta goditi një kamion që ecte në të njëjtën rrugë.

Pas njoftimeve, në vendngjarje mbërritën menjëherë skuadrat e shpëtimit, policia dhe 6 autoambulanca. Ata nxorrën nga autobusi njerëzit e lënduar, shoferin në gjendje shumë të rëndë dhe personin që qëndronte në karrigen e ndihmësit të shoferit, fatkeqësisht pa jetë.

Ambulancat dërguan në Spitalin Universitar të Janinës, pesë pasagjerët të plagosur dhe trupin e pajete ne morg. Policia nisi hetimet për gjetjen e shkakut të aksidentit.(balkanweb)