Banka turke HalkBank zyrtarizoi hyrjen e saj në tregun bankar në Maqedoni përmes riemertimit të Ik Bankës nga Shkupi.

Drejtori ekzekutiv i kësaj banke Juxhel Inan e cila sipas fitimit të arritur radhitet e 6-ta në botë, theksoi se mundësia për rritje të shpejtë ekonomike të Maqedonisë dhe stabilitetit të sistemit bankar në vend, ka ndikuar që kjo bankë turke të marrë vendim që të hyjë pikërisht në tregun e Maqedonisë.

“Maqedonia ka stabilitet, Maqedonia ka ardhmëri të mirë sa i përket rritjes ekonomike, ndërsa disa shtete të tjera të rajonit tashmë kanë marrë përfitime nga hyrja e bankave të huaja në vitet ‘2000 dhe tani në fakt nuk janë atraktive”, tha Juxhell Inan, drejrtor ekzekutiv i HalkBank.

Inan u shpreh se Halk Bank do të synojë që të bëhet bankë kryesore në Maqedoni përmes ofrimit të shërbimeve me kamata më të ulëta.

“Strategjia jonë për tërheqjen e klientëve të rinj është e thjeshtë. Ne do të jemi më të mirë nga konkurrenca sepse do të jemi shumë konkurrentë në çmime, dhe kemi ndër kamatat më të ulëta në këtë treg”, tha Juxhell Inan drejtor ekzekutiv i HalkBank.

HalkBank është një ndër bankat kryesore në Turqi dhe këtë e vërteton edhe kapitali i saj i cili në vitin 2010 ka pasur fonde aktive prej 35 miliardë eurosh, ndërsa kapitali i saj ka arritur në 3.5 miliardë euro. Shkalla e kthimit të kapitalit gjatë vitit të kaluar arriti nivelin prej 30 %, ndërsa fitimi neto i kësaj banke në vitin 2010 kapi shifrat prej 1 miliardë eurosh.