Nuk ka argumente për hyrje të një partie të re në koalicionin qeveritar, deklaroi ministri i Vetëqeverisjes Lokale Musa Xhaferi në konferencën për shtyp me euroambasadorin Ervan Fuere pas promovimit të Programit - IPA për bashkëpunim tejkufitar midis Republikës së Maqedonisë dhe Republikës së Shqipërisë.

"Nuk ka argumenente për të pasur plus ndonjë parti në këtë koalicion. Këtë nuk e them për ineteresa subjektive, por për atë se kjo Qeveri ka shumicën e dy të tretës, e cila atëherë do të shndërrohej në shumicë absolute", tha Xhaferi, i pyetur nëse ka vend në koalicionin qeveritar për një parti nga blloku shqiptar.

Sipas tij, është indikative që po intesifikohet çështja nëse, për çka siç tha, "fraksioni i ri i PDSH-së, e cila quhet Demokracia e Re do të ketë vend në Qeveri".

"Siç bëri të ditur edhe vetë kryetari Imer Selmani, ajo duhet të dëshmohet në betejë politike si opsion i ri, ndërsa pastaj do të ketë mundësi të garojë në zgjedhje dhe të tregojë si më tej", tha Xhaferi i cili vëren se nuk ka hapësirë as fizike, për anëtarë të rinj në seancat qeveritare.