Kryetari i Bashkisë së Tiranës, Lulzim Basha priti sot në zyrën e tij, aktoren e njohur shqiptaro-amerikane, Eliza Dushku. Kryebashkiaku, i dhuroi aktores Kullën e Sahatit të Tiranës, simbolikën e qytetit, si dhe i bëri të ditur se do t`i propozojë Këshillit Bashkiak për t`i dhënë titullin “Qytetare Nderi e Tiranës” dhe emërimin si “Ambasadore Nderi e Tiranës në Botë”.

“Jam e nderuar dhe e privilegjuar”, tha aktorja Dushku, e cila hyri në zyrën e Kryetarit të Bashkisë duke thënë: "Përshëndetje", në shqip. Dushku i tha Bashës se ishte e befasuar nga energjia që kishte parë në Tiranë si dhe u interesua më tej për planet dhe projektet që ka Bashkia.

Kryebashkiaku Basha e informoi aktoren e njohur për programin që ai ka për ta bërë Tiranën një qytet më të mirë për të gjithë. Po ashtu në kët takim, kryetari i Bashkisë e njohu me planet për përmirësimin e cilësisë së jetës, për krjimin e hapësirave të gjelbërta, ndërtimin e më shumë shkollave, si dhe për përpjekjet për ta bërë Tiranën një destinacionin tërheqës përturizmin dhe biznesin.

Basha e shoqëroi Eliza Dushkun në vizitën që ajo bëri tek Muzeu dhe Sahati i Tiranës si dhe bëri me të një shëtitje në Bulevardin e Tiranës.

Aktorja, shqiptaro-amerikane, Eliza Dushku gjendet në Shqipëri për të bërë një dokumentar mbi rrënjët e saj shqiptare, me një ekip televiziv amerikan si dhe me agjensinë “Lonely Planet”, e cila e ka renditur Shqipërinë si destinacionin numër 1 në botë. Ajo do të qëndrojë 10 ditë dhe do të vizitojë disa qytete të Shqipërisë.