Presidenti francez Nikolla Sarkozi dhe kancelarja gjermane Angela Merkel në letrën të cilën sot ia kanë dërguar Herman Van Rompujit, kërkuan nga ai që të bëhet kryetar i eurozonës, në pajtim me atë që e paralajmëruan në konferencën e djeshme për shtyp.

Në letër, siç njoftoi korrespondenti i MIA-s nga Parisi, Sarkozi dhe Merkel i shkruajnë kryetarit të BE-së, se shtatëmbëdhjetë "shefat e shteteve dhe të qeverive të eurozonës do të zgjedhin kryetarin e tyre me mandat prej dy vite e gjysëm".

"Ne e shprehim dëshirën tonë që ju të mundeni ta ushtroni këtë detyrë", qëndron në letër.

Sarkozi dhe Merkel mëtej theksojnë se "Eurogrupi i ministrave të financave duhet të përforcohet".

"Euroja është themel i suksesit tonë ekonomik dhe simbol i bashkimit politik të kontinentit", shkruajnë Sarkozi dhe Merkel. Ata gjithashtu shtojnë se në pajtim me vendimin e tyre të miratuar në samitin e mbrëmshëm në Pallatin e Eliseut, Franca dhe Gjermania propozojnë "përforcim edhe më të madh të eurozonës, në korniza të marrëveshjeve ekzistuese".