Me rastin e muajit të bekuar të Ramazanit, në organizim të Komunës së Bajrampashës dhe me mbështetje të Komunës së Gostivarit në cilësinë e nikoqirit, mbrëmë nën moton “Vëllazëria nuk njeh kufij”, u shtrua iftar për rreth një mijë besimtarë myslimanë.

Në këtë ngjarje madhështore miqësore morën pjesë kryetari i komunës së Gostivarit Rufi Osmani, kryetari aktual i komunës së Bajrampashës Atila Ajdëner dhe ish kryetari i të njëjtës komunë Hysein Byrge, ministri i arsimit të Turqisë Omer Binçer, ministri pa resor në Qeverinë e RM-së Hadi Nezir, deputetë në parlamentin e Turqisë dhe të Maqedonisë, myftiu i Gostivarit Shaqir ef. Fetahu dhe personalitete tjera politike shoqërore dhe fetare nga Maqedonia dhe Turqia.

Pas iftarit të përbashkët, lutjen që Allahu t’ua bëjë kabull ditën e agjëruar të gjithë besimtarëve të pranishëm, e bëri myftiu i Gostivarit Shaqir ef. Fetahu.

Të pranishmëve, në cilësinë e nikoqirit iu drejtua, kryetari i komunës së Gostivarit Rufi Osmani i cili përshëndeti mysafirët e lartë nga Turqia dhe i falënderoi për iftarin e shtruar për të dytin vit radhazi.

“Me komunën e Bajrampashës kemi një bashkëpunim të shkëlqyer në më shumë lëmi deri më tash, dhe shpresoj se ky bashkëpunim do të vazhdojë dhe do të thellohet në të ardhme. Ky iftar i përbashkët, është një dëshmi më shumë se qytetarët e Gostivarit, këtë komunë dhe Turqinë në përgjithësi e konsiderojnë si mik të vërtetë”, theksoi mes tjerash kryetari i komunës së Gostivarit. “Shpresoj se në perspektivë, edhe Komuna e Gostivarit, do të shtrojë një iftar madhështor për vëllezërit tanë në Bajram pasha, siç e shtron Komuna e Gostivarit për qytetarët e Gostivarit”, nënvizoi në fjalimit e tij kryetari Rufi Osmani.

Të pranishmëve me fjalime rasti iu drejtuan edhe kryetari i komunës Bajrampasha, ministri i arsimit të Turqisë, si dhe ministri pa resor në qeverinë e Maqedonisë Hadi Nezir.

Atmosferën miqësore të këtij evenimenti e bëri më të këndshme programi i pasur kulturor me muzikë mistike dhe popullore turke, si dhe me valle popullore shqiptare në interpretim të SHKA “Jahi Hasani” nga Çegrani.