Edhe pse ministri i Arsimit, Ramë Buja e konsideron të mbyllur çështjen e edukatës fetare në shkolla, Partia e Drejtësisë duket e vendosur që ta çojë përpara këtë punë.

Lideri i kësaj partie ka thënë se do të propozojë mbajtjen e një referendumi. “Mund të bëhet një referendum me pyetjen nëse jeni për ose kundër edukatës fetare në shkolla. Besoj se shumica do ta përkrahin propozimin tonë”, ka thënë Agani në emisionin Interaktiv të KTV-së, të hënën mbrëma.

Ministri është shprehur i zhgënjyer me deputetët e PDK-së që votuan kundër në Kuvend, por ka thënë se koalicioni nuk lëkundet nga refuzimi i mësim-besimit. Agani ka pohuar se Komisioni që do të formohet do të marrë praktikat evropiane dhe ligjet në fuqi, për të dhënë një rekomandim të ri në Kuvend.