Në mbledhjen e djeshme, kushtuar situatës në Kosovë, Këshilli i Sigurimit i KB-së nuk e dënoi aksionin "e njëanshëm" të Prishtinës, më 25 korrik dhe përpjekjen e saj për të ndryshuar realitetin në terren, shkruan e përditshmja e "Politika" e Beogradit, duke iu referuar burimeve diplomatike në Nju-Jork.

Sipas gazetës, kërkesa e Rusisë dhe e Serbisë për deklaratë me të cilën u dënua përdorimi "i njëanshëm" i dhunës nga ana e Prishtinës është bllokuar.

Qëndrimin e Serbisë që me deklaratën presidenciale të KS-së të dënohej Prishtina e kanë mbështetur Kina, Brazili, India, Afrika e Jugut, Libani dhe Gaboni. Ndër vendet anëtare të Këshillit të Sigurimit, që nuk e kanë njohur Kosovën, janë edhe Bosnja e Hercegovina dhe Nigeria.

Kundër deklaratës presidenciale janë SHBA-ja, Franca, Gjermania, Britania e Madhe, Portugalia dhe Kolumbia.

Vendet që kundërshtuan deklaratën presidenciale nuk kanë dashur vetë të propozojnë ndonjë deklaratë me përmbajtje tjetër, por thjeshtë kanë refuzuar diskutimin për një gjë të tillë.

Turqia ka shprehur interesim që në mënyrë më të drejtpërdrejtë të kyçet dhe të ndërmjetësojë në dialogun midis Prishtinës dhe Beogradit, duke e pasur parasysh suksesin e arritur në ripërtëritjen e marrëdhënieve midis Serbisë dhe Bosnjës, deklaroi shefi i diplomacisë turke Ahmet Dautogllu. Ai theksoi se Ankaraja i kushton vëmendje të madhe sovranitetit dhe integritetit territorial të Kosovës.