Zëvendës-kryetari i Qeverisë së Republikës së Maqedonisë Musa Xhaferri, sot ka realizuar takim me ambasadorin e Republikës së Shqipërisë në vendin tonë, Arben Çejku.

Në këtë takim të parë, siç kumtoi Sektori për marrëdhënie me opinionin, zëvendëskryeministri Musa Xhaferri e njoftoi ambasadorin Çejku për prioritetet e Qeverisë së re të Republikës së Maqedonisë. Ai theksoi se në mesin e pesë prioriteteve të Qeverisë është edhe implementimi i Marrëveshjes së Ohrit, marrëveshje kjo e cila sipas tij, stabilizoi Maqedoninë, vendosi bazat e një shtetit shumë etnik dhe hapi rrugën drejt anëtarësimit në strukturat euroatlantike.

Ambasadori i Republikës së Shqipërisë Arben Çejku e uroi Xhaferrin për emërimin e tij në postin e zëvendës-kryeministrit që drejtpërdrejt do të jetë i angazhuar për implementimin e Marrëveshjes së Ohrit.

Çejku theksoi se Shqipëria mbështet implementimin e Marrëveshjes së Ohrit dhe se ky dokument është shumë i rëndësishëm për paqen në Maqedoni dhe rajon.

Dy bashkëbiseduesit vlerësuan se marrëdhëniet mes dy vendeve janë të mira dhe se ky bashkëpunim i mirë ndërfqinjësor do të vazhdojë edhe në të ardhmen.