“Me punën tuaj, ju e keni bërë këtë vend më njerëzor dhe më të drejtë”.

Me këto fjalë iu është drejtuar drejtuesve dhe edukatorëve të fshatit SOS, kryeministri Berisha, i pranishëm në ceremoninë e 15-vjetorit të këtij institucioni edukues në kryeqytet.

“Fshatrat SOS janë një model suksesi dhe një frymëzim i vërtetë, për të gjithë ata që në mendjen dhe zemrën e tyre kanë fëmijët, të parët e më të parëve.

Ndaj edhe unë ju garantoj se institucionet publike në vend frymëzohen dhe do të frymëzohen nga modeli juaj dhe se qeveria do të bëjë gjithçka për një bashkëpunim sa më të ngushtë me fshatrat SOS, për jetësimin e këtij modeli dhe përshtatjen e tij, në të gjitha institucionet e tjera të kujdesit për fëmijë”, tha ai.