Kënga më e re e Leonora Jakupit, kënduar në javën e fundit të spektaklit “E Diela Shqiptare”, në përmbyllje të prezantimit të festivalit “Kënga Magjike”, dyshohet të jetë e vjedhur. Vija melodike e baladës me titullin “Këngë e pa kënduar”, mësohet se është kënduar më parë nga një këngëtare serbe. Për më tepër, serbja Jelena Tomaseviç e ka kënduar këngën “Oro” në një event shumë të rëndësishëm muzikor, sikurse është Festivali Evropian i vitit 2008.

E pyetur nga disa media, këngëtarja simpatike kosovare nuk ka dashur të prononcohet, ndërkohë që këtë edicion, festivali “Kënga Magjike” është “akuzuar” për disa këngë të vjedhura, sikurse ka qenë edhe aludimi për “Botën do ndryshoja” të Besa Kokëdhimës, që shumë e kanë krahasuar për ngjashmërinë e madhe me këngën “Funcking Perfect” të Pinkut.

Dy ditë më parë u njoftua se Adrijan Gaxha ishte përjashtuar nga ky festival, për shkak se me të njëjtën këngë që ai konkurronte te “Kënga Magjike”, ishte paraqitur edhe në një festival në Maqedoni. Sa i takon Leonorës, për të bërë krahasimin, më poshtë keni link-et përkatëse të të dyja këngëve, asaj në shqip dhe këngës së serbes: