Familja e Jasharit nga fshati Orizarë të Kumanovës dorëzuan eksponate që flasin për trimërinë e Ismet Jashari Kumanova. Uniforma, urdhri Hero i Kosovës si dhe flamuri i brigadës së tij u bënë pjesë e muzeut të shqiptarëve të Maqedonisë.
Driton Dikena
Uniforma me të cilën ra dëshmorë Ismet Jashari- Kumanova më 26 gusht 1998 në Luzhnicë gjatë konfrontimit me njësitet okupatore serbe si dhe urdhri Hero i Kosovës , nënshkruar nga presidenti i Kosovës, Fatmir Sejdiu si dhe flamuri i Brigadës 121 Ismet Jashari-Kumanova, janë bërë pjesë e Muzeut të lirisë në Shkup që nga e hëna e kësaj jave.
Vëllai i dëshmorit legjendar nga Orizara e Kumanovës, Xhemail Jashari si dhe gjenerali i TMK-së, Haxhi Shala, i cili ka luftuar së bashku me Ismet Jasharin u dorëzuan eksponatet që flasin për trimërinë e Komandant Kumanovës, Komisionit për ngritjen e Muzeut të lirisë.
Xhemail Jashari shprehu kënaqësinë që Urdhri Hero i Kosovës dhënë vëllait të tij për trimërinë e pa shoq treguar në front të luftës nga ana e presidentit Sejdiu, do të bëhet pjesë e muzeut të parë shqiptarë në Shkup.
Këto eksponate të vëllait tim Ismetit, do të bëhet pjesë e këtij muzeu, theksoi Xhemali duke falënderuar kryetarin e Komunës së Çairit Izet Mexhiti për hapin që ka marrë të hapë këtë muze.
Ai bëri të ditur se me këto eksponate të dorëzuara sot nuk do të përfundoj sepse ai ka edhe shumë dokumente të tjera që flasin për aktivitetin patriotik jo vetëm të vëllait të tij Ismetit por edhe të familjes Jashari nga Orizarja e Kumanovës që shekuj të tërë ka qenë bartëse e të arriturave të shqiptarëve.
Një pjesë të eksponateve që i kisha fshehur gjatë konfliktit të vitit 2001 një predhë i shkatërroi por përsëri kanë mbetur edhe disa të tjera, tha mes tjerash Xhemail Jashari.
Edhe Haxhi Shala, bashkëluftëtarë i Ismet Jasharit, theksoi se ideja e ndërtimit të këtij muzeu është një ide e shkëlqyeshme ngase gjeneratat që do të vinë më pas do të mësojnë për veprat tonë që po lejmë tani.
Komandat Topi bëri të ditur se dorëzon uniformën e Ismet Jasharit të cilën e ka mbajtur veshur në momentin kur ka ra dëshmorë në datën 26 gusht 1998 si dhe flamurin e Brigadës 121 me po të njëjtin emër.
I ruaj këto eksponate që nga viti 1998. Mu bë qejfi që tani këto do të jenë pjesë e këtij muzeu sepse do të mbesin të pa vdekura, theksoi Komandat Topi duke shtuar se Ismeti është këtu me veprën e tij, luftën e tij, respektin qe kanë shqiptarët dhe krenohemi se e kemi pas një bashkëluftëtar të tillë.
Sipas tij një komb që ka heronj është komb i nderuar sepse ka pasur bij dhe bija të cilët kanë qenë të gatshëm të sakrifikojnë jetën e tyre për një jetë më të mirë për popullin e tyre dhe ky është mesazhi që i bëhet nderimi, atyre të cilëve u përkulemi përjetësisht ngase e kemi obligim ndaj amanetit të tyre.
Kryetari i Komisionit për ngritjen e muzeut, Skënder Asani falënderoi për kontributin që dhanë familja Jashari në pasurimin e Muzeut të lirisë ndërsa bëri të ditur se është dorëzuar edhe një fotografi e vitit 1912 e cila paraqet luftën e shqiptarëve për çlirimin e Shkupit. Fotografia është dorëzuar nga Emin Limani nga Shkupi.
