Kryeministri i Rusisë, Vladimir Putin, sot ka pranuar nominimin për president nga partia Rusia e Bashkuar. Putin u tha delegatëve të partisë Rusia e Bashkuar se ishte falënderues për të gjithë ata që e kanë mbështetur kandidaturën e tij ndërsa e pranoi kandidaturën me fjalët, “me mirënjohje e pranoj këtë propozim”.

Stanislav Govorukhin, ishte ai që fillimisht nominoi Vladimir Putinin për të kandiduar për president, në një kongres të partisë Rusia e Bashkuar në Moskë.

Duke folur para delegatëve në këtë kongres, Govorukhin tha “Ruisë i duhet një lider, i aftë, i fortë, inteligjent dhe i gatshëm të mbrojë jo vetëm liritë dhe të drejtat e qytetarëve por edhe t’u rikujtojë atyre përgjegjësitë dhe ti shtyjë përpara në përmbushjen e obligimeve të tyre”.

Ndërsa vazhdoi “ne kemi një person të tillë – Vladimir Vladimiroviq Putin”.

Presidenti aktual rus, Dimitri Medvedev gjithashtu foli, duke e quajtur Putinin “politikanin më popullor, më me përvojë dhe më të suksesshëm në Rusi”.

Zgjedhjet presidenciale në Rusi pritet të mbahen në muajin mars të vitit 2012.