Mbretëresha e muzikës pop, Madonna e cila me vite ka përgatitur terrenin për interpretuese ekstravagante si Lady Gage, po përballet me kritika të ashpra nga ana e bijës së saj.

Në të vërtetë, Loudres është e dëshpëruar me sjelljet dhe veshjen e nënës së saj. “Loudres u thotë miqve të saj se do të dëshironte që e ëma e saj të ndryshonte dhe të jetë më shumë e ngjashme me nënat e zakonshme”, ka thënë një mik i familjes.

Vajza 15-vjeçe, nuk është e kënaqur me shijen e së ëmës për meshkuj dhe do të dëshironte që ajo të dashurit e saj t’i zgjedhë sipas moshës së vet dhe jo gati dyfish më të rinj se ajo.

“Loudres po rritet, e do mamanë e saj dhe nuk dëshiron që dikush ta përqeshë”, ka thënë ky burim. Madonna momentalisht është në lidhje me valltarin Brahim Zaibat, ndërsa para tij ishte në romancë me modelin brazilian 23-vjeç, Jesus Lutz.