Kampioni i madh do ta vendosë edhe një herë titullin e tij në një ankand të rrezikshëm. Ukrainasi Vitali Kliçko, kampioni i botës në peshat e rënda në boksin profesionist, do të ndeshet në shkurt me britanikun me origjinë nga Zimbabve, Derek Çisora, në një betejë që ka nisur që tani. Siç është zakon në këtë sport, gjithçka nis me fjalë dhe përfundon më pas në ring, me grushta. i pari flet sfidanti.

“Ndeshja është vetëm pak javë larg. Unë e njoh kundërshtarin tim, ndërsa ai nuk ka parë kurrë një kundërshtar si unë. Atë e quajnë doktori, ndërsa unë e quaj veten time si sëmundjen më të rrezikshme në botë. Ndaj, shpresoj që ai të gjejë mjekimin për këtë sëmundje, pasi do të marrë tronditjen më të madhe të jetës. Shpresoj që ai të mos tërhiqet si vëllai i tij i vogël”, thotë Çisora.

Gjigandi nga Ukraina dëgjon dhe pastaj flet, ndonëse më pak sesa sfidanti i tij i ri.

“Përballë meje është një boksier i ri, që është i egër, i uritur. Sipas mendimit tim, ai është më i forti në botë. Unë nuk mund të ndeshem me boksierë të dobët. Pres një ndeshje të fortë dhe shrpesoj që rivali im t’i kthejë fjalët në vepra. Të gjithë spektatorët presin një betejë interesante”, thotë Kliçko.

Vitali Kliçko është 40 vjeç, shtatlartë 2 metra dhe ka 43 fitore në 45 ndeshje si profesionist. Çisova vendoset përballë ti si një 28-vjeçar, me shtatlartësi 1.83 metra, me 15 fitore dhe 2 humbje në karrierë dhe me ambicie të mëdha.