Në Ankara u hodh sot lopata e parë për gazsjellësin e ri trans-kontinental i quajtur “Nabuko”. Në realitet, stilolapsat ishin lopata për funksionarët e Austrisë, Bullgarisë, Rumanisë, Hungarisë dhe Turqisë.

Ata firmosën marrëveshjen ndërshtetërore të bashkëpunimit në fushën e lëvrimit të gazit natyror. Në këtë akt morën pjesë edhe funksionarë të lartë të SHBA-ve, por personalisht edhe presidenti i Komisionit Evropian, Zhoze Manuel Baroso.

Gazsjellësi “Nabuko” duhet që të jetë i gjatë 3.300 kilometra dhe t’i lidhë shtetet e Evropës Qendrore dhe një pjesë të atyre ballkanike me vendet prodhuese të gazit në rajonin e Kaspikut dhe Detit të Zi dhe të Azisë Qendrore. Kapaciteti i gazsjellësit do të jetë prej 25 e deri më 30 miliardë metra kub gaz në vit, kurse pritet që të përfundojë deri në vitin 2012.

Gazeta britanike “Taims” në analizën e sotme për gazsjellësin “Nabuko” thekson se ai do ta eliminojë monopolin e “Gazpromit” rus në furnizimin e Evropës me gaz. Edhe një lajm interesant sot ka të bëjë me gazsjellësit. Në të vërtetë sipas gazetës ruse “Komersant”, mandatori i ri për formimin e Qeverisë bullgare, Bojko Borisov, kërkoi që të ndërpriten bisedimet për pjesëmarrjen bullgare në gazsjellësin “pro-rus” – “Përroi jugor”.

Tani për tani, nga Moska përgënjeshtrojnë se kanë një kërkesë të tillë zyrtare nga Bullgaria. Në gazsjellësin “Përroi jugor” është përfshirë edhe Greqia. Për të firmën vitin e kaluar e kanë vënë Moska, Sofja dhe Athina.