Kancelaria gjermane Angela Merkel të hënën arrin për vizitë zyrtare në Kosovë. Merkel gjatë vizitës në vendin tonë do të takohet me kryeministrin e Kosovës, Hashim Thaçi, si dhe me forcat gjermane që shërbejnë në kuadër të KFOR-it.

Merkel vjen në Kosovë për të përcjellë mesazhe lidhur me bisedimet ndërmjet Kosovës dhe Serbisë.

Në samitin e paradokohshëm të shefave të shteteve të Bashkimit Evropian (BE), pikërisht kancelarja gjermane ishte më e vendosura për refuzimin e kërkesës së Serbisë për marrjen e ftesës për fillimin e bisedimeve për anëtarësim në këtë union, dhe kjo për faktin e mospërmbushjes së kërkesave që ajo ia kishte bërë me kohë presidentit serb Boris Tadiq lidhur me Kosovën.

Gjithashtu, në qëndrimin e fuqishëm të Gjermanisë ndikoi edhe plagosja e disa ushtarëve të saj në përbërje të KFOR-it nga ana e të barrikaduarve serbë në veri të Kosovës.