Pop këngëtarja Madonna do të nxjerrë një album të ri në fund të muajit mars vitin e ardhshëm, ka njoftuar shtëpia diskografike “Interscope Records”.

Madonna do të nxjerrë në fund të janarit singlin e saj “Gimme All Your Luvin”, si dhe do të performojë në pushim të pjesës së parë në finalen e kampionatit të futbollit amerikan, që do të mbahet më 5 shkurt.

Albumi i fundit i Madonnas, "Hard Candy", i vitit 2008, është pritur shumë mirë nga kritikët. Hiti kryesor i këtij albumi ishte dueti me superyllin amerikan, Justin Timberlake, "4 Minutes".

Ditë më parë revista e mirënjohur amerikane “Forbes”, ka njoftuar se Madonna gjatë vitit të kaluar ka fituar 58 milionë dollarë, ndërsa pasuria e pop mbretëreshës sipas kësaj reviste arrin shifrën prej 500 milionë dollarësh.