Ministri i Vetëqeverisjes Lokale i Republikës së Maqedonisë, Nevzat Bejta sot qëndroi për vizitë zyrtare në Hungari, me ç'rast u takua me ministrin e Punëve të Brendshme të Hungarisë Sandor Pinter.

Bejta e falënderoi për ftesën dhe pritjen homologun e tij dhe biseduan për mundësitë e thithjes së fondeve evropiane nga ana e Maqedonisë.

Në këtë rast Republika e Hungarisë dhe ministri Pinter i ofruan ministrit Bejta që administrata e Ministrisë së Vetëqeverisjes Lokale të dërgohet në trajnim në Hungari, me qëllim që administratorët të mësojnë nga përvojat hungareze për t’i thithur më lehtë mjetet e IPA fondeve të Unionit Evropian. Në të ardhmen u la që të përgatiten "Twining programs" programe të përbashkëta midis Maqedonisë dhe Hungarisë.

Ministri Pinter tha se Hungaria shpreh dëshirë për vëllazërimin e komunave hungareze me komuna ne Maqedoni. Në janar të vitit të 2012 do të realizohet takim mes ministrit Bejta dhe ambasadorit Hungarez, që konkretisht të punohet në këtë temë.

Një temë tjetër që u diskutua në takimin midis ministrit Bejta dhe ministrit Pinter ishte edhe zhvillimi rajonal. Bejta tha se Republika e Maqedonisë ka ligj për zhvillim të barabartë rajonal dhe se në bazë të këtij ligji qendrave rajonale duhet t'u ndahet 1 për qind nga Bruto prodhimi vendor.