Instituti Nacional Demokratik për Marrëdhënie Ndërkombëtare (NDI) në bashkëpunim me Qendrën për Shërbime Studentore dhe Karrierë të USHT-së, para studentëve, stafit akademik dhe administrativ, prezantuan projektin për punësimin e 25 administratorëve shtetërorë në Institutin Parlamentar të Kuvendit të Republikës së Maqedonisë.

Arta Jusufi, përfaqësuese nga NDI, para stafit akademik-administrativ dhe studentëve, prezantoi në detaje për kushtet, kriteret dhe mënyrat e aplikimit në këtë konkurs.

Ajo theksoi se Instituti Nacional Demokratik për Marrëdhënie Ndërkombëtare (NDI) ka ndërmarrë këtë aktivitet për ta njoftuar mbarë opinionin e gjerë për punësimet e lartpërmendura dhe se NDI, si organizatë prestigjioze, ka insistuar që këto punonjës të administratës, që nga momenti kur do të fitojnë statusin e nëpunësit shtetëror, marrëdhënia e tyre e punës të jetë në afat të pacaktuar.

Ndërsa, Daut Memeti, përgjegjës i Qendrës për Shërbime Studentore dhe Karrierë të USHT-së, falënderoi NDI-në, që kishin zgjedhur USHT-në për promovimin e këtij projekti për punësimin e 25 administratorëve të rinj.

“Ne jemi të bindur se në kuadër të këtij projekti edhe studentët e diplomuar në USHT do të kenë fatin që të punojnë në Institutin Parlamentar të Kuvendit të Republikës së Maqedonisë, pasi që përvoja e deritanishme ka dëshmuar se kuadrot e diplomuar në universitetin tonë janë të përgatitur dhe i plotësojnë kriteret e nevojshme për të aplikuar në të gjitha konkurset e administratës publike dhe shtetërore në vend”, theksoi z. Memeti.