Në komunën e Çairit në Shkup, Bashkësia e Njësive të Vetëqeverisjes Lokale promovoi pajisjet dhe kabinat për përkthim simultan. Me këto pajisje janë furnizuar gjithsej 29 komuna të Maqedonisë.

Mjetet për pajisjet, në vlerë prej 27 milionë denarë janë siguruar nga ndihma buxhetore që BNJVL kishte pranuar në vitin 2005 nga Agjencia zvicerane për bashkëpunim dhe zhvillim.

“Edhe ky promovim i sotshëm shkon në raport të kultivimit të mëtutjeshëm të këtyre vlerave qytetëruese njërëzore, shkon në favor të bashkëpunimit, të njohjes më të mirë në mes popujve të komunës sonë dhe në të mirë të promovimit të një qasje serioze për plotësimin e njërit prej kushteve të parashtruara prej institucioneve të BE-së për inkuadrimin e vendit tonë në strukturat euroatlantike, gjithmonë duke pas parasysh edhe Marveshjen e Ohrit.”, tha Izet Mexhiti, kryetar i komunës së Çairit.

“Nga deklaratat që dëgjova më parë e pashë se sa këto pajisje do të jenë efikase në komunikimet mes nesh, pasi që në këtë rast nuk është e nevojshme që të presim njëri tjetrin, andaj vendosja e këtyre pajisjeve është më se e dobishme në një vend multietnik. Edhe Zvicra është vend me bashkësi të ndryshme etnike, dhe për këtë shkak jam shumë e bindur se sa do të jenë të nevojshme këto pajisje për përkthime.”, deklaroi Nikoll Virch, ambasadore e Zvicrës në Maqedoni.