Babai ka vetëm katër javë që ka vdekur, por mes djemve të tij ka nisur që tani sherri. Luftë brenda familjes në Korenë e Veriut- Kim kundër Kimit.

Djali më i madh i diktatorit të vdekur Kim Jong Il, Kim Jong Nam, 41 vjeç, ka sulmuar vëllain e tij, Kim Jong Un, 29 vjeç, që ka marrë përsipër drejtimin e shtetit. “Ai mendon se vëllai i tij do të dështojë,” thotë autori Yoji Gomi, që ka përgatitur një libër për jetën e djalit të madh të Kim Jong Il.

Për më tepër, vetë Kim Jong Nam i ka dërguar një e-mail redaksisë së gazetës japoneze Tokyo Shimbun, ku shprehet se vëllai i tij po përdoret nga elitat për të siguruar pushtetin. “Ai është tepër i ri dhe nuk ka as eksperiencën, as përgatitjen për të drejtuar,” thotë Nam.

Autori i librit, Yoji Gomi, ka realizuar disa intervista me djalin e madh të diktatorit dhe thotë se ka mbetur i befasuar nga qëndrimi i tij. Ai ishte njeri shumë i hapur dhe i zgjuar, mendon autori Gomi. Ndoshta është kjo një arsye se përse babai i tij nuk zgjodhi t’ia linte atij pushtetin.