Bullgaria do t`i pezullojë vizat për qytetarët e Maqedonisë prej fillimit të vitit 2010, paralajmëroi sot Ministria e Punëve të Jashtme në Sofje.
"Ende s`ka vendim të Bashkimit Evropian (BE) për pezullimin e vizave. Pritet që kjo të ndodhë prej 1 janarit të vitit 2010. Në momentin kur kjo masë do të zbatohet nga BE-ja ndaj Maqedonisë, Serbisë dhe Malit të Zi, Bullgaria në mënyrë të paanulueshme do ta përmbushë të njëjtën", deklaroi zëvendësministri i Jashtëm i Bullgarisë në dorëheqje Milen Keremedçiev.
Ai bëri të ditur se Bullgaria mbështet liberalizimin e vizave për Maqedoninë dhe ka qenë e përfshirë në negociatat për pezullimin e vizave.
"Si vend anëtar i BE-së morëm pjesë në negociatat e Brukselit me Maqedoninë dhe i mbështesim, si dhe vazhdojmë t`i mbështesim për pezullimin e vizave - edhe për Maqedoninë, edhe për Serbinë edhe për Malin e Zi. Nuk do të mund të thoja se do të ketë çfarëdo ngadalësimi të pezullimit të vizave", deklaroi Keremedçiev për agjencinë "Fokus" të Sofjes.