Presidenti kroat Ivo Josipoviç vijon ditën e dytë të vizitës së tij në Shqipëri. Ditën e sotme ai do të mbajë një leksion në Universitetin e Tiranës dhe do të vendosë kurorë me lule për nder të Dëshmorëve të Kombit.

Ai gjithashtu do të zhvillojë edhe një takim me Kryetarin e Bashkisë së Tiranës Lulzim Basha, ndërsa do të vizitojë edhe qytetin e Durrësit dhe të Krujës.

Gjatë vizitës së tij në Durrës, presidenti Josipoviç do të drekojë me kreun e bashkisë Vangjush Dako ku do të jetë i pranishëm edhe kryetari i Partisë Socialiste Edi Rama. Gjithashtu Josipoviç do të vizitojë edhe Amfiteatrin dhe Portin e Durrësit.

Presidentit kroat Josipoviç do ta përmbyllë vizitën e tij në Shqipëri me një vizitë në Kalanë e Krujës, Muzeun Etnografik, dhe në Muzeun “Skënderbeu”.