Me parulla “Dëshirojmë të mësojmë aty ku duam e jo ku na çoni”, si dhe “Poshtë konkursi diskriminues”, nxënësit shqiptarë që kanë konkurruar në shkollën e mesme të mjekësisë “Pançe Karagjozov” kërkuan plotësimin e kërkesave të tyre.

Ata goditën me domate dhe vezë në godinën e Ministrisë. Përfaqësues të këshillit të prindërve sot u takuan me ministrin e arsimit por takimi mbaroi pa ndonjë zgjidhje konkrete.

















Protesta e nxënësve u mbështet edhe nga deputeti Safet Neziri si dhe këshilltari në qytetin e Shkupit nga radhët e Demokracisë së Re, Bekim Fazliu.

“Biseda konkrete jo, konkretisht nuk kemi as nga ana jonë e as nga ana e tyre. Kështu që mbetemi në të njejtin qëndrim për 8 paralele. Sot mbarojnë protestat pasi 3 ditë jemi para ministrisë, dëshiruam të hënën të protestojmë para qeverisë por pasi e mbledhim dokumentacioni për të shohim se cili është numri i saktë i nxënësve dhe pastaj do të ulemi të bisedojmë, sepse ndoshta janë 300 në 8 paralele e ku do të shkojnë ata?”, theksoi Enver Miftari – kryetar i këshillit të prindërve.

Ministri nuk deshi të prononcohet pas takimit por siç kuptuam, ai në takimin e sotëm ka insistuar që nxënësit që janë jashtë Shkupit të mos regjistrohen në “Pançe Karagjozov” pasi ata në qytetet e tyre kanë shkolla për mjekësi.

“Ne mendojmë se këto prindër dhe këtë nxënës kanë të drejtë të mësojnë në gjuhën e tyre kjo korrespodon edhe me drejtën e tyre ligjore. Gjithashtu kemi një kontradiktë nga ajo që jepet një kampanjë agresive nëpër mediume ku qeveria kinse ofron kushte të barabarta për shkollimin e të gjithë nxënësve, mirëpo prezenca e gjithë këtyre personave këtu tregon se kemi probleme”, deklaroi Bekim Fazliu- këshilltar në Qytetin e Shkupit prej Demokracisë së Re.

Këshilli i prindërve të nxënësve shqiptarë që kanë konkurruar në shkollën e mesme të mjekësisë “Pançe Karagjozov” u bëjnë apel nxënësve që dokumentet që shkolla ua kishte kthyer me postë, t’i sjellin të hënën në shkollën “Pançe Karagjozov” nga ora 10 deri në orën 12.