Dy partitë që dikur bashkëqeverisnin vendin, Lidhja Demokratike e Kosovës (LDK) dhe Aleanca për Ardhmërinë e Kosovës (AAK) kanë humbur karakterin e të qenit në opozitë. Madje, kohën e fundit këto dy parti opozitare, janë “hipnotizuar” nga kryeministri Hashim Thaçi duke rënë në “gjumë dimëror”. Kështu të paktën konsiderojnë analistët politikë në Prishtinë, të cilët e konsiderojnë kryeministrin Hashim Thaçi si “një mjeshtër të madh të amortizimeve politike”.

Sipas analistëve, LDK-ja dhe AAK-ja muajt e fundit nuk janë vërejtur se janë gjallë, ndërkaq, pjesëmarrja në një drekë pune me kryeministrin dhe më pas mbështetja e Rezolutës me të cilën institucionet e vendit zotohen se do t’i përmbushin të gjitha obligimet që dalin nga Pako e Ahtisaarit, i ka bërë ato edhe më “qeveritare”.

Kjo situatë, sipas tyre, u ka ndihmuar jashtëzakonisht shumë udhëheqësve të Lëvizjes “Vetëvendosje”, të cilët momentalisht kanë mbetur pothuajse të vetmit opozitarë te të cilët qeverisë i ka hasur “sharra në gozhdë”.

Analisti Nexhmedin Spahiu thotë se kryeministri Thaçi i ka futur në “gjumë të thellë” LDK-në dhe AAK-në, ndërkaq “Vetëvendosja” ka mbetur e vetme në betejën me qeverinë. (zëri)