Sekretarja amerikane e shtetit, Hillari Klinton ka bërë thirrje që Shtetet e Bashkuara dhe Evropa të përmirësojnë bashkëpunimin për ripërtritjen globale ekonomike dhe promovimin e demokracisë në Botën Arabe.

Duke folur në Konferencën ndërkombëtare të Sigurisë në Munih të Gjermanisë, Klinton tha se Evropa dhe Shtetet e Bashkuara duhet “krah për krah” të luftojnë tiraninë në vendet si Siria. Në këtë kontekst ajo ka lëshuar akuzua ndaj liderit Bashar al-Asad, për “brutalitet” ndaj popullit të tij.

Klinton gjithashtu ka bërë thirrje për unitet në çështjet ekonomike, duke thënë se të dy palët duhet të “riforcojnë ripërtritjen e njëri-tjetrit”.

Këto komente të zyrtares së lartë amerikane shihen si përpjekje nga administrata e Shteteve të Bashkuara, për energji të re në raportet SHBA-Evropë, përkundër shkurtimeve amerikane të buxhetit, tërheqjes së trupave nga Iraku dhe Afganistani dhe fokusimi në rritje në Azi.