Varrezat myslimane në Strugë mbrëmë vonë ishin në shënjestër të vandalëve. Persona të panjohur demoluan tri tyrbe ku ishin të varrosur personalitete të shquara shpirtërore dhe ku qytetarët vinin të ndeznin qirinj për ndonjë hall apo për të kërkuar shëndet.

Janë demoluar edhe disa pllaka përkujtimore. Shkaku për këtë ngjarje të pahijshme ende nuk dihet, thotë Abdulla Pashoski i ngarkuar për mirëmbajtjen e varrezave myslimane.

‘Këtë e vërejta në mëngjes kur erdha në punë në orën 7 e 20 minuta. Më pas kuptova se Adil Gazaferi me kryetarin e komunës Ramiz Merko kaluan këtu më orën 19 dhe nuk ndodhi asgjë. Edhe më vonë nuk kishte asgjë. Në mëngjes kur erdha në punë pash dhe rastin e lajmërova në myfti. Ai tha se rastin do ta denoncojë në polici.

Erdhën, panë ... tre objektet janë të demoluara, ku ndizen qirinj dhe ku njerëzit kërkojnë shërim për ndonjë të sëmurë.‘, rrëfen Abdulla Pashoski, rojtar i varrezave.
Për ngjarjen e këtillë janë të revoltuar edhe në Bashkësinë Fetare Islame në Strugë.Ajo këkron nga organet e rendit që të punojnë për ndriçimin e plotë të këtij akti të shëmtuar.

Nga policia thonë se në mëngjes kanë kryer kontrollin dhe se kanë ndërmarrë masa plotësuese për ndriçimin e rastit. Dyshohen disa persona, por hetimi më tej do të konfirmoj numrin e personave për të cilët do të ngriten kallëzime penale.