Një aeroplan me 80 pasagjerë, shumica nga ta shqiptarë, i ka shpëtuar për mrekulli një incidenti që ka mundur të jetë me pasoja fatale.

Foto dramatike janë bërë publike pasi avioni ndeshi një tufë zogjsh, gjatë ngritjes nga Aeroporti i Dusseldorfit. Aeroplani Boeing 737-700 me 80 pasagjerë në bord, po fluturonte për në Prishtinë.

Tufa e shpendëve që u përplas me aeroplanin që po udhëtonte me 300 kilometra në orë, bëri që motori në anën e djathtë të dalë jashtë përdorimit. Aeroplani i Germania Airlines u detyrua të kthehej përsëri në pistë, shkruan Bild.

Zogj, rreth 20 cm të gjerë dhe me peshë rreth 75 gramë, goditën trupin e avionit dhe motorin si një sprej plumbash.

“Zhurma e motorit u ndryshua në një shpërthim të papritur”, i ka thënë Bildit, një dëshmitare.

“Ishte një situatë kritike, megjithatë ky Boeing mund të fluturojë vetëm me një motor”, ka thënë Jörg Handwerg, zëdhënës i Unionit të Pilotëve – Cockpit.

Pasi ka pësuar goditjen e zogjve, piloti ka bërë zgjedhjen e duhur, duke u kthyer mbrapa dhe ulur në Dusseldorf, rreth 45 minuta më vonë.

Zëdhënësi i Aeroportit, Christian Witt, ka konfirmuar se njëri nga motorët ishte goditur nga zogjtë, dhe se aeroplan tani është duke u kontrolluar.